ابنتي

أكياس حلويات و أكل و لعب كتير قوي محسسني إننا مش هنرجع معاه تاني أول ماجه خرجت له من الأوضة و أنا لابسة و جاهزة كانوا قاعدين بيحكوا و يتكلموا عادي ماحدش جاب سيرة الخناقة خالص لقيت إن الموضوع هيطول و هو قرب يمشي و مقالش حاجة روحت قومت و شيلت البنت و قولتلها قدامهم كلهم
"يلا يا كرمة عشان نرجع مع بابا"
لما سمع كلامي قام وقف و قال
"يلا عشان نسيب عمي ينام كفاية الدوشة اللي عملتيها يا كرمة."
سلمنا عليهم و الحمد لله الموضوع مع أهلى عدى بسلام فاضل الكوم الكبير!!
الهم التقيل أهله هو.
و احنا مروحين كلمني.
"على فكرة أنا استجدعتك."
"ف ايه"
"عشان شكلك مش حاكية لأهلك حاجة استغربت إن ماحدش فيهم كلمني في أي حاجة."
"أيوه."
"ماحدش سألك منهم يعني"
"هما يعرفوا إننا شاديين سوا لكن مايعرفوش التفاصيل."
"ماحكتيش ليه"
"عادي مافيش داعي يعرفوا مشاكلنا تتحل ما بينا."
"من امتى العقل ده"
"عادي الواحد بيكبر و المفروض عقله و تفكيره يكبروا معاه."
أول ما رجعت البيت و دخلنا الشقة أخد كرمة و نزل عند أهله قال ايه عشان كرمة وحشتهم كرمة اللي بيتريقوا عليها وحشتهم!!
أول حاجة عشان تحافظي على سلام بيتك و هدوءه
هو إنك تختصري بس للأسف مش هتعرفي تختصري على طول هتبدأي الإختصار واحده واحده لإنك عودتيهم على الإختلاط و العشم الجامد ما بينكم فهتحاولي تسحبي رجلك من عندهم واحده واحده
مره أنا تعبانة ماقدرتش أنزل
و مره بعمل أكل مش فاضية
أصل كرمة بتاخد دش و معذباني
بنضف الشقة كرمة نايمة
بحيث تتجنبي كتر القعدات معاهم اللي بتسمعك كلام يضايقك.
اللي تسمعيه منهم ماتقوليهوش لحد لا لإبراهيم و لا حتى بينك و بين نفسك و لا لأهلك نقل الكلام بيعمل مشاكل و بيخلى النفوس تشيل 
أي كلمة تسمعيها كأنك ماسمعتيهاش.
بلاش ڠضب سريع اتعلمي تردي عليهم في هدوء و أنت بتضحكي اوعي يبان عليك إنك مضايقة و حرقوا دمك هتقولك بنتك شعرها كيرلي اضحكي و ابتسمي و قوليلها 
"
عيالنا كلهم عيالنا و لازم نحبهم و نحب شكلهم شعرهم كيرلي متأخرين في المشي متأخرين في الكلام اهم عيالنا."
ردي عليها و ماتسكتيش بس رد بذكاء
الرد اللي يخليها تفهم إنك عارفة تردي بدون ماتمسك عليك غلطة و تقول حورية بتضايقني!!
لما تعرف إنك عارفه تردي عليها و مش هتسكتي هتقلق تجر شكلك تاني مره
بس اوعي ردك يعمل مشكلة عشان الموضوع مايكبرش.
اوعي تشتكي كل شوية منهم كتر شكوتك منهم لجوزك هيخليه يضايق منك أنت مش منهم أنت عارفة إبراهيم كويس لا هيتخانق مع أهله و لا هيخرج من البيت ده ف الحل ايه!!
تخلصي مشاكلك معاهم بطريقتك قبل ما يجي و لما يجي ماتحكيش أي حاجة
طلعتي يا حبيبتي عند أهلي النهارده
اه يا حبيبي طلعتي
حصلت حاجة
أبدا ماحصلش حاجة.
لكن هتاكلي ودانه بقى أمك قالت و أختك قالت هتخليه يكره البيت و يكره قعدتك و يكره اليوم اللي بيرجع لك فيه.
أكيد وقتها هتحسي إن في كوم كبير من الكلام هينفجر جواك لو مخرجش هتعملي ايه!
هتفتحي نوت الموبايل و تكتبي فيها كل حاجة بحيث تطلعي طاقة غضبك منهم و تصفي نفسك قبل ما جوزك يجي.
لما يبقى إبراهيم قاعد معاك عنده أهله تتعمدي تخليهم ينطقوا قدامه و تثبتي غلطتهم 
يعني تيجي أمه تقولك كلمة تروحي تبصي ناحيته و تسكتي
البصة دي معناها..
شايف أمك بتقول ايه
أنا مش هرد تقديرا ليك!! 
و لما تطلعوا شقتكم بقى تبقى واخده على خاطرك و مضايقة
من نفسه هيحاول يراضيك حتى لو ماعرفش يعاتبهم على إنهم زعلوك بس